Zëvendëssekretarja e Përgjithshme e NATO-s, Radmilla Shekerinska, vlerësoi kontributin e Shqipërisë dhe Kroacisë në stabilitetin rajonal, duke nënvizuar se këto vende janë aleate të rëndësishme dhe kontribuese të paqes në rajon. Në këtë kontekst, ajo përmendi praninë e tyre në KFOR dhe angazhimin për të mbështetur agjendat e sigurisë në Ballkan.
Gjatë marsit të kaluar, Kosova, Shqipëria dhe Kroacia nënshkruan një marrëveshje për bashkëpunimin në siguri dhe mbrojtje. Zyrtarët e mbrojtjes të këtyre tri vendeve kanë kryer dy takime në këtë muaj për zbatimin e marrëveshjes dhe kanë paralajmëruar një stërvitje të përbashkët për vitin në vijim. Ky bashkëpunim ka shqetësuar Serbinë, me presidentin Aleksandar Vuçiq që e cilëson këtë si një “aleancë sulmuese”.
Shekerinska sqaroi se NATO nuk është e përfshirë në negocimet për këtë deklaratë, por theksoi se anëtarësimi në aleancë nuk ndalon vendet të krijojnë marrëveshje mbrojtëse me shtete të tjera. Ajo gjithashtu u bëri thirrje aleatëve për dialog politik për të zgjidhur çështjet e hapura në rajon dhe e ripërsëriti mbështetjen e NATO-s për dialogun mes Kosovës dhe Serbisë.
Vuçiq shprehu shqetësim për bashkëpunimin mes Kosovës, Shqipërisë dhe Kroacisë, duke njoftuar se Serbia do të rrisë investimet në mbrojtje. Në përgjigje, ministri i Mbrojtjes i Kroacisë, Ivan Anusheviq, theksoi se ky bashkëpunim nuk paraqet kërcënim për askënd, duke përshkruar marrëveshjen si një përpjekje për të forcuar stabilitetin dhe sigurinë në Evropën Juglindore.
Sipas marrëveshjes, tre vendet do të fokusohen në fusha të ndryshme bashkëpunimi, përfshirë mbështetje në industri mbrojtëse, edukim dhe trajnim, si dhe blerje të përbashkëta të armatimit nga SHBA-të. Ndërkohë, lidhur me incidentin në Banjskë të Zveçanit në shtator 2023, Shekerinska raportoi se NATO ka marrë garanci nga Beogradi për përcaktimin e përgjegjësive.
Kosova kërkon ekstradimin e politikanit Millan Radoiçiq, i cili ka marrë përgjegjësinë për sulmin në Banjskë, por deri tani nuk është ndjekur penalisht. Prokuroria Speciale e Kosovës ka ngritur një aktakuzë lidhur me këtë çështje.
