Napoli hyn në javën e 5-të të Ligës së Kampionëve me një presion të madh, duke grumbulluar vetëm katër pikë në katër ndeshje. Skuadra e trajnerit Antonio Conte do të përballet me Qarabag në “Diego Armando Maradona”, në një moment delikat për shkak të dëmtimeve që kanë goditur rëndë ekipin. Megjithatë, fitorja e fundit ndaj Atalantës në Serie A ka sjellë rikthimin e energjisë dhe besimit.
Në një konferencë për shtyp, Conte theksoi se skuadra ka hyrë në ndeshje me energji pozitive dhe se do të kenë nevojë për një intensitet të lartë përballë një kundërshtari të fortë, që ka shfaqur performanca të mira këtë sezon. Ai përmendi gjithashtu datën e rëndësishme të përvjetorit të Maradonës, duke shprehur dëshirën për ta nderuar atë me një fitore: “E dimë çfarë përfaqëson Diego për këtë qytet. Do të ishte e bukur të fitonim tri pikë.”
Conte konfirmoi se Hojlund dhe Rrahmani do të jenë të gatshëm, ndërsa situata e Gilmour dhe Spinazzola është e paqartë, megjithatë ai shprehu optimizëm se problemi nuk është muskulor. Ai theksoi domosdoshmërinë për të përfshirë të gjithë lojtarët në skuadër, duke aktivizuar pesë lojtarë ndryshe nga sezoni i kaluar në ndeshjen me Atalantën.
Përsa i përket të rinjve dhe lojtarëve të rinj në ekip, Conte ishte optimist në lidhje me Neres dhe Lang, të cilët treguan përgjigje pozitive gjatë ndeshjes së kaluar. Ai pranoi se skema me tre mbrojtës është një zgjidhje e detyruar nga situata e tanishme, por e konsideroi atë si një mundësi për të mbrojtur dhe sulmuar në mënyra të ndryshme.
Në lidhje me Romelu Lukakun, Conte tha se ai nuk është i gatshëm për ndeshjen kundër Romës dhe se mbetet shumë punë për të bërë për rikuperimin e tij. Sipas tij, Lukaku është një lojtar kyç dhe i nevojshëm për skuadrën, si në fushë ashtu edhe jashtë saj. Napoli tani përballë një sfide të rëndësishme, shpreson për dy rezultate pozitive në ndeshjet e ardhshme.
