Evropa përballet njëkohësisht me papunësi të lartë dhe mungesë fuqie punëtore. Sipas Eurostat, rreth 13 milionë persona ishin të papunë në BE në maj të këtij viti, ndërsa miliona vende pune mbeten të lira dhe tërheqin emigrantët.
Papunësia dhe mungesa e fuqisë punëtore janë probleme serioze në të gjithë Evropën. Eurostat vlerëson se rreth 13.1 milionë persona ishin të papunë në BE në maj të këtij viti. Megjithëse Komisioni Evropian ka ndërmarrë disa politika për të adresuar sfidat në punësim dhe çështje sociale në BE, miliona vende pune vazhdojnë të mbeten të lira. Në tremujorin e dytë të vitit 2025, Gjermania kishte mbi 1 milion pozicione të lira, ndërsa Franca rreth gjysmë milioni. Po si renditen vendet evropiane në këtë sektor?
Në përllogaritjen e shkallës së vendeve të lira të punës, merret parasysh si numri i pozicioneve të lira, ashtu edhe i vendeve të zëna për të pasqyruar kërkesën totale. Kjo shkallë tregon përqindjen e pozicioneve që janë të disponueshme. Në tremujorin e dytë të vitit 2025, 2.1% e vendeve të punës në BE ishin të lira. Kjo përqindje është më e ulët krahasuar me 2.2% në tremujorin e parë të vitit 2025.
Shkalla e vendeve të lira të punës varion nga 0.6% në Rumani, që ka nivelin më të ulët, deri në 4.2% në Holandë, që ka nivelin më të lartë. Ky kontrast i madh pasqyron dallimet e mëdha në tregjet e punës evropiane. Më pas renditet Belgjika (me 4.1%), si dhe Austria e Norvegjia (të dyja me 3.4%). Kjo tregon se Evropa Veriperëndimore ka kërkesën më të lartë për punonjës, ndërsa Evropa Lindore dhe Jugore paraqesin nivele më të dobëta.
Pas Rumanisë, shkallët më të ulëta të pozicioneve të lira i gjejmë në Spanjë dhe Poloni (0.8%), Bullgari (0.9%) dhe Turqi e Sllovaki (1.1%). Gjermania dhe Franca, dy ekonomitë më të mëdha të Evropës, kanë një shkallë prej 2.5%, mbi mesataren e BE-së (2.1%). Ndërsa në Itali, kërkesa është 1.7%.
Ndër 30 shtetet evropiane të marra nën shqyrtim, Gjermania ka numrin më të lartë të vendeve të lira të punës, me 1.05 milion. Në të njëjtën kohë, vendi mbetet destinacioni më i preferuar për emigracion në Europë. Sipas Eurostat, në vitin 2023, ajo priti numrin më të madh të emigrantëve: 324,000 nga vendet e BE-së, 905,000 nga vende jashtë bllokut dhe 42,000 me origjinë të panjohur, një total prej 1,271,000 personash.
Ndërsa Spanja paraqet një situatë të ndryshme. Ajo renditet e 8-a për nga numri i vendeve të lira me 145,000, por është shumë pranë Gjermanisë për nga numri i emigrantëve, me gjithsej 1.25 milion. Mbretëria e Bashkuar renditet e dyta me 781,000 vende të lira pune, e ndjekur nga Franca me 504,000. Kurse Holanda zë vendin e katërt me 400,000 pozicione të lira.
