Kushtet e pafavorshme të motit kanë ndikuar në lundrimet e trageteve në linjën Durrës-Bari. Sipas Autoritetit Portual Durrës, një nga dy tragetet e planifikuara për nisje gjatë natës së kaluar nuk ka mundur të dalë në det, për shkak të motit të rënduar.
Udhëtarët që janë prekur nga kjo situatë janë asistuar nga kompanitë lundruese, të cilat kanë marrë masa për sistemimin dhe ridrejtimin e tyre në nisjet e shpejta, duke garantuar vazhdimësinë e udhëtimit. Për ditën e sotme, 5 janar, lëvizja e trageteve parashikohet të zhvillohet sipas një programi të caktuar. “Rigel VII” pritet të mbërrijë në port në orën 11:00 dhe të niset në 13:00. “Rigel V” është planifikuar të mbërrijë rreth orës 15:00, me nisje të parashikuar në 23:00. “Rigel III” pritet të mbërrijë rreth orës 21:00 dhe të niset pas mesnatë. Ndërkaq, “GNV Cristal” ka një nisje të planifikuar për në orën 23:00.
Autoriteti Portual Durrës njofton se situata po monitorohet vazhdimisht në bashkëpunim me kompanitë lundruese dhe strukturat përgjegjëse, duke e vendosur si prioritet garantimin e sigurisë së udhëtarëve e mbarëvajtjen e operacioneve portuale.
