Ndërsa presidenti ukrainas Volodymyr Zelensky zhvillonte një takim të rëndësishëm me Donald Trump në Shtëpinë e Bardhë, presidenti rus Vladimir Putin nuk mbeti pasiv. Ai zhvilloi biseda telefonike me liderët e Indisë, Brazilit dhe Afrikës së Jugut, duke për të forcuar lidhjet me aleatët e BRICS dhe për të vlerësuar pozicionin e Rusisë në arenën ndërkombëtare.
Zëdhënësi i Kremlinit, Dmitry Peskov, i përshkroi bisedimet për paqe si një proces të gjatë, ndërsa zëdhënësja e Ministrisë së Jashtme, Maria Zakharova, kritikoi ashpër praninë e trupave të huaja në Ukrainë. Ajo akuzoi Britaninë e Madhe për “shtyrje të NATO-s drejt një konflikti global”, duke e cilësuar Londrën si një nga aktorët më provokues.
Zakharova theksoi se Londra është fokusuar në përshkallëzimin e konfliktit dhe po përpiqet të sabotojë përpjekjet për dialog mes Moskës dhe Uashingtonit. Së bashku me këto komente, mediat shtetërore ruse kanë shprehur një ton triumfalist, duke ironizuar liderët evropianë dhe duke sugjeruar se Rusia ka dalë e fituar nga ky konflikt.
Në disa raportime, u tha se “i gjithë koalicioni luftënxitës evropian fluturoi me Zelensky-n në Uashington, por as ndihma e tyre nuk e shpëtoi nga qortimet”. Një komentues rus përkrahu përshkrimin e Bashkimit Europian si një “plakë të përkulur” dhe presidentin francez Emmanuel Macron si “gorillë”. Analistët në Rusi besojnë se takimi në Shtëpinë e Bardhë mund të shënojë fundin e afërt të luftës në Ukrainë.
Megjithatë, ndonëse fjalori zyrtar ngulmon në fitore, ndihen shenja pasigurie. Termat si “denazifikimi” dhe “demilitarizimi”, të cilat ishin dikur të zakonshme në diskursin e Kremlinit, duket se janë zhdukur. Rusia shpall se ka triumfuar, por mbetet për t’u parë nëse ky version do të pranohet nga bota.
