Komuniteti dibran që jeton në Mbretërinë e Bashkuar, ka protestuar në një prej rrugëve kryesore të Londrës për të ndaluar ndërtimin e Hidrocentralit të Skavicës. Siç shihet nga pamjet e siguruara nga newsbomb.al, komuniteti dibran ka kërkuar që heci të mos bëhet.
“Mos shkatërroni Dibrën”, “Mos u dorëzoni” dhe shumë pankarta të tjera kundër shkatërrimit të burimeve ujore të Dibrës dhe kundër kompanisë amerikane “Bechtel”, shqiptarët janë ndalur përballë godinës së Institutit të Inxhinierëve të Ndërtimit.
“Bechtel largohu, lëre Dibrën”, ishte slogani i kryesor i tubimit të organizuar nga komuniteti dibran, para institucionit ku siç thonë ata, kompania amerikane po negocionte pazarin për mbytjen e Dibrës.
Sipas asaj që redaksia ka mësuar, bëhet fjalë për një numër të madh dibranësh kryesisht nga fshati Blliçë, por jo vetëm, të cilët kishin organizuar këtë tubim. Godina e Institutit të Inxhinierëve të Ndërtimit, në “One Great George Street” të Londrës është zgjedhur qëllimisht.
Paraditen e së enjtes 20 tetor kur është zhvilluar dhe protesta, kompania Bechtel, e njëjta që ka ndërtuar dhe Rrugën e Kombit, ishte duke zhvilluar një ankand ndërkombëtar për gjetjen e nënkontraktorëve që do të zhvillojnë projektin në Shqipëri.
Ndërtimi i HEC Skavicës është cilësuar nga Qeveria shqiptare si një projekt madhor me impakt jo vetëm në sistemin elektro-energjetik, por edhe në ekonominë kombëtare të vendit. Projekti mendohet të kushtojë midis 308 dhe 510 milionë euro.
Ky projekt do të sigurojë optimizimin e Kaskadës së Drinit, eliminimin e përmbytjeve në zonën e fushë Shkodrës dhe fushë Lezhës, si dhe rritjen e sigurisë dhe efiçencës në veprat hidrike në HEC-et ekzistuese të kaskadës. Ndërkohë, Dibra proteston fushat e saj, sipas deklarimeve, do të përmbyten.
Integrimi i HEC Skavicës me kaskadën e Drinit mund të sjellë disa avantazhe, si: krijon rezervën ujore më të madhe në Europë, prej 7 miliardë m3 ujë dhe, aseti më i rëndësishëm strategjik kombëtar; si dhe disiplinon përmbytjet në të gjithë rrjedhën e Drinit; rrit sigurinë e digave poshtë saj dhe mundëson menaxhimin e integruar të kaskadës duke e rritur eficiencën me rreth 10%.
