FIER-Ditën e sotme kanë përcjellë për në banesën e fundit 19-vjeçarin Grei Bihuci, i cili u vra gjatë një sherri në qendër të Fierit ditën e djeshme. Mediat kanë intervistuar disa prej kolegëve të tij të cilat janë shprehur se e njihnin për djalë të mirë. Njëra nga koleget e prekur rrëfen se ai e trajtonte si motër dhe argëtohej me fëmijët e saj.
“Djalë i dashur me të gjithë ne, nuk ishte thjesht shoku dhe kolegu jonë, por ishte vëllai jonë. Dinte vetëm të thërriste motër motër. Ka mbajtur fëmijët e mi në krah. Nuk ka për tu harruar kurrë. Më vjen keq për nënë dhe motrat. Grei ke për të mbetur në zemrat tona. Nuk ishte vetëm një djalë, por ishte gjithçka për ne”.
Një koleg tjetër zgjodhi të japi një mesazh gjatë kësaj interviste, ku bëri thirrje për çdo të ri që të tregohet i kujdesshëm duke marrë për shembull se një konflikt banal mund të çojë në përfundimin e fatit të Greit.
“Na ka shokuar të gjithëve si pjesë e stafit ku Grei punonte. Ishte një djalë i përkushtuar, i dashuri. Thirrja që dua të bëj përtej ngushëllime është që rinia sot të qëndrojnë me këmbë në tokë që mos përfundojë si Grei. I shpreh ngushëllime familjes. Jemi shumë të shokuar”.
“Grei ishte një nga pjesëtarët e stafit, një nga djemtë më të mire që kishim në staf, na vjen vërtet keq që u ndodh në vendin e gabuar dhe në momentin e gabuar. Nuk ishte djalë që sillte probleme”, tha një koleg.
“Kjo që ka ndodhur na ka shokuar të gjithëve. Ishte një djalë i përkushtuar, një djalë i dashur. Thirrja që dua të bëj është që të mundohet rinia e sotme të qëndrojnë me këmbë në tokë që mos të përfundojnë si Grei”, u shpreh një tjetër.
Ndërkohë, policia ka arrestuar autorët e krimit të rëndë, shkak për të cilin u bë një sherr i nisur në rrjetet sociale.
“Në vijim të informacionit paraprak të dhënë ditën e djeshme, për ngjarjen e ndodhur reth orës 11:30, në bulevardin “Jakov Xoxa”, Fier, informojmë se në vijim të veprimeve hetimore dhe procedurale të kryera nga specialistët për Hetimin e Krimeve të Rënda të DVP Fier, në drejtimin e Prokurorisë, u arrestuan në flagrancë shtetasit 18 vjeç, banues në Fier dhe 17 vjeç, banues në fshatin Kallm i Madh, Fier. Nga veprimet hetimore dyshohet se këta 2 shtetas, në bashkëpunim me njëri-tjetrin, pas një konflikti për motive të dobëta, kanë vrarë me mjet prerës (thikë), shtetasin 19 vjeç, dhe kanë plagosur shtetasin 20 vjeç, i cili është në spital, jashtë rrezikut për jetën. Në cilësinë e provës materiale janë sekuestruar një mjet prerës (thikë) dhe një përforcues grushti, të cilat janë gjetur në vendin e ngjarjes”, njofton policia.
