SHBA- Elon Musk ka reaguar ndaj akuzave për përdorim droge gjatë fushatës me anë të një postimi në platformën “X”, teksa i mohon ato. Reagimi i tij vjen një ditë pasi New York Times raportoi se miliarderi mori sasi të konsiderueshme ketamine, ekstazi dhe kërpudha halucinogjene gjatë fushatës zgjedhore.
“Për të qenë i qartë, unë nuk marr drogë! New York Times gënjen. Kam përdorur ketaminë me recetë disa vite më parë dhe postova në lidhje me të në X, kështu që kjo nuk është asgjë e re. Nuk e kam bërë më që atëherë”, shkroi Musk.
Në artikullin e saj, NYT raportoi se Musk konsumoi sasi të konsiderueshme ketamine, një anestetik me efekte stimuluese, ekstazi dhe kërpudha halucinogjene gjatë fushatës zgjedhore.
Elon Musk ka deklaruar më parë publikisht se përdor doza të vogla ketamine për të luftuar tendencat depresive dhe se kjo e ndihmon atë të punojë në mënyrë më efikase. Por, NYT e bazoi artikullin e saj në mesazhe private dhe intervista me më shumë se 10 njerëz që e njohin Musk ose kanë punuar me të.
