Presidenti i Ukrainës, Volodymyr Zelensky, ka paraqitur një projektligj të ri që synon rivendosjen e pavarësisë së dy institucioneve kryesore antikorrupsion në vend, Byrosë Kombëtare Kundër Korrupsionit (NABU) dhe Zyrës së Prokurorit të Specializuar Kundër Korrupsionit (SAP).
Vendimi i Zelenskyt vjen vetëm disa ditë pasi mijëra qytetarë protestuan në rrugët e qyteteve ukrainase kundër një ligji të miratuar më herët këtë javë, i cili e vendoste veprimtarinë e NABU dhe SAP-it nën kontrollin e prokurorit të përgjithshëm – një pozitë e emëruar nga vetë presidenti.
Protestat e zhvilluara në të gjithë vendin përbënë demonstratat më të mëdha që nga fillimi i pushtimit rus në shkallë të plotë, në shkurt të vitit 2022. Demonstruesit mbanin pankarta dhe kërkonin anulimin e ndryshimeve ligjore që, sipas tyre, kërcënonin efektivitetin e luftës kundër korrupsionit dhe pavarësinë e institucioneve.
Ndërkohë, partnerët perëndimorë të Kievit – përfshirë Bashkimin Evropian dhe Fondin Monetar Ndërkombëtar – shprehën shqetësime serioze, duke e paralajmëruar Ukrainën se sundimi i ligjit dhe pavarësia e institucioneve antikorrupsion janë kushte thelbësore për procesin e integrimit evropian, raporton BBC.
Në një deklaratë të enjten, Zelensky tha se projektligji i ri është “i ekuilibruar mirë” dhe se synon të mbrojë pavarësinë e NABU dhe SAP, si dhe t’i ruajë ato nga ndikimi rus. Megjithatë, ai nuk dha detaje të mëtejshme për përmbajtjen e projektligjit.
NABU e përshëndeti projektligjin e ri, duke deklaruar se ai “rikthen të gjitha fuqitë procedurale dhe garancitë e pavarësisë” për të dy institucionet.
Komisioni Evropian gjithashtu reagoi pozitivisht, duke e “mirëpritur” vendimin e qeverisë ukrainase dhe duke konfirmuar se po punon me Kievin për të siguruar që të gjitha shqetësimet të adresohen siç duhet.
