Inspektori i IMT-së në Tiranë, Klajdi Zhilla është vetëdorëzuar ditën e djeshme në Policinë e Tiranës.
Lidhur me këtë ka reaguar zyrtarisht edhe Policia e Shtetit të cilët bëjnë me dije se Klajdi Zhilla, 35 vjeç, banues në Tiranë, vendosi që të dorëzohej.
35-vjeçari ishte shpallur në kërkim në kuadër të operacionit “Hapësira publike”, për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.
Burime për mediat bëjnë me dije se Zhilla mori 1 mijë euro ryshfet për të mos hequr tendën e një lokali në zonën e Kominatit.
Në momentin që policia ndërhyri ai arriti që të largohej me automjetin e tij tip “Audi”, ndërkohë që vetëm një ditë më parë, i shoqëruar nga avokati i tij, ai u vetëdorëzua në Policinë e Tiranës.
Njoftimi i Policisë së Shtetit:
Në vijim të operacionit policor të koduar “Hapësira publike”, specialistët e Sektorit për Hetimin e Korrupsionit në Drejtorinë për Hetimin e Krimeve Ekonomike dhe Financiare bënë ndalimin e shtetasit K. Zh., 35 vjeç, banues në Tiranë, inspektor i IMT, bashkia Tiranë, i cili u vetëdorëzua në Policinë e Tiranës.
Ky shtetas ishte i shpallur në kërkim, në kuadër të operacionit “Hapësira publike”, për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.
Materialet procedurale u referuan për veprime të mëtejshme në Prokurorinë e Posaçme kundër Korrupsionit dhe Krimit të Organizuar.
