Me urdhër të Agjencisë së Mbikëqyrjes Policore është arrestuar përgjegjësi i doganës së Kakavijës, doganieri i kontrollit fizik dhe është shpallur në kërkim një tjetër punonjës i doganës.
AMP kishte dyshime se doganierë dhe efektivë policie ishin të përfshirë në skema korruptive në lidhje me procedurat e parregullta të zhdoganimit duke përfituar shuma parash.
Gjatë operacionit të nisur prej mëngjesit të së shtunës e deri në orët e para të së dielës janë konstatuar 1 trajler, 4 kamionë të tonazhit të rëndë si dhe mjete të tjera të mbushura me mallra që kaluan pikën kufitare pa kryer kontrolle si dhe duke i shmangur pagesave të zhdoganimit.
