Deputetja e Partisë së Lirisë, Monika Kryemadhi, vijon me denoncimin e aferës së inceneratorëve.
Sot Kryemadhi në një deklaratë për mediat ka nxjerrë filmimet e zhvilluara përgjatë 180 ditëve në inceneratorin e Tiranës.
Kryemadhi thotë se këto filmime hedhin poshtë deklaratat e kryeministrit Rama i cili më herët tha se në inceneratorin e Tiranës bëhet ndarja në burim, riciklimi dhe djegia. Sipas pamjeve të siguruara nga Partia e Lirisë në këtë incenerator bëhet vetëm kapsulimi.
Kryemadhi shtoi se këto pamje do i dorëzohen të gjitha SPAK-ut dhe nëse Prokuroria e Posaçme Kundër Korrupsionit dhe Krimit të Organizuar nuk merr masa, atëhere asaj si ngelet gjë tjetër veçse të dalë të protestojë jashtë ambienteve të këtij organi.
Ndër të tjera ajo tha shqiptarët paguajnë 29 euro për ton për groposjen e mbetjeve dhe organet e drejtësisë duhet të veprojnë për të ndaluar pagesat që qeveria jep ndaj inceneratorit të Tiranës ku transportohen mbetje edhe nga bashkitë e tjera.
“Edi Rama dhe Erion Veliaj duhet të dalin të dy para drejtësisë për aferën e inceneratorëve. Deklaratat e tyre në Komisionin Hetimor janë gënjeshtra dhe për veprimet dhe deklarimet e tyre duhet të dalin bashkë. Edi Rama dhe Erion Veliaj në dy kokat kryesore të grupit të strukturuar kriminal të aferës së inceneratorëve”, tha Kryemadhi.
“Ky ishte një material i shkurtër në të gjitha xhirimet që ne kemi bërë në 180 ditë në të gjithë procesin e menaxhimit të mbetjeve. Mos harroni se në inceneratorin e Tiranës nuk depoziton vetëm bashkia e Tiranës por edhe të tjera. Ju e keni parë sesi bashkia e Durrësit ka planifikuar 10 milionë dollarë. Kjo është një pjesë e vogël e qindra orëve të filmimeve që kemi të veprës së krimit.
Shqiptarët sot paguajnë 29 euro për ton vetëm për groposjen pa llogaritur shpenzimet e tjera transportin e me rradhë. Deri më sot nuk kemi asnjë veprim nga drejtësia shqiptare që më e pakta që mund të bënte është ndërprerja e pagesave për një kompani offshore”, shtoi ajo.
