TIRANË– Agravon protesta e thirrur nga Rithemelimi dhe Partia e Lirisë tek Bashkia e Tiranës. Edhe sot, protestuesit kanë hedhur molotovë në derën e Bashkisë së Tiranës.
Ka nisur përsëri ditën e sotme protesta para Bashkisë Tiranë kundër dosjes 5D. Qindra qytetarë janë mbledhur para bashkisë dhe po protestojnë për korrupsionin dhe tenderat e vjedhur. “Hajdutë, hajdutë,” është thirrja e qytetarëve në protestë. Sekretari i Përgjithshëm i Partisë së Lirisë, Tedi Blushi u ka bërë thirrje qytetarëve që t’i bashkohen protestës.
Blushi thotë në rrjetet sociale se kur drejtësia me regji i amniston dhe i mbron të korruptuarit, është populli që i arreston. Ai shton se në protestë duhet të mblidhen kundër vjedhjes së taksave, kundër dhunës dhe përjashtimit social, kundër rrëmbit kriminal të pronave dhe të shembjes antiligjore të shtëpive, kundër ndotjes vrastare të ajrit, kundër zhdukjes së hapësirave të gjelbërta dhe kundër betonizimit të kryeqytetit.
Një person i dyshimtë është filmuar ditën e sotme në tarracën e Bashkisë Tiranë. Teksa qindra qytetarë po protestojnë kundër dosjes 5D dhe korrupsionit, një i infiltruar nga Bashkia po u bën foto protestuesve. Personi ka vënë një kapuç në kokë në mënyrë që të mos njihet nga kamerat dhe qytetarët. Nuk dihet se cili është qëllimi i fotove që personi i futur nga kryebashkiaku Veliaj, po u bënë protestuesve. Aktori Mehdi Malkaj ka marrë pjesë në protestën e sotme para Bashkisë së Tiranës kundër korrupsionit dhe dosjes 5D. Malkaj para protestuesve ka deklaruar se bashkia e Tiranës është kthyer në një institucion kriminal. Po ashtu ka theksuar se në atë bashki nuk ka me njerëz të ndershëm.
