Dy vite hetime lidhur me vdekjen e 3-vjeçarit, Braian Spahiu, pas trajtimit në një klinikë private, çuan në arrestimin e mjekut Roland Xhaxho dhe vajzës së tij stomatologe, Ina Xhaxho. Prokuroria ka kërkuar masë më të ashpër sigurie, por gjykata vendosi t’i lërë ata në arrest shtëpie, ndërsa akuzohen për “vrasje nga pakujdesia”.
Fëmija u paraqit në klinikë në shtator 2023 për të trajtuar demineralizimin e dhëmbëve me anestezi totale, që rezultoi në komplikacione. Pas tre ditësh kurim në urgjencën e pediatrisë, Braiani ndërroi jetë më 1 tetor 2023.
Rreth ngjarjes, gjyshi i fëmijës deklaroi se e çuan te dentisti për pastrim dhëmbësh, por pas konsultimit, mjeku sugjeroi një operacion që prindërit e miratuan. Babai, Bledar Spahiu, e dërgoi fëmijën në klinikën dentare në rrugën e Kavajës, ku mjeku Roland Xhaxho i bëri anestezi totale për të kryer ndërhyrjen.
Pas operacionit, mjeku i kërkoi babait të marrë djalin në shtëpi dhe t’i japë mjekimin e rekomanduar. Megjithatë, sapo u kthyen në shtëpi, Braiani filloi të ndihej keq. Prindërit, duke u shqetësuar për gjendjen e tij që po përkeqësohej, përpiqen të kontaktojnë klinikën private, por nuk morën asnjë përgjigje. Nga frika, ata vendosin ta çojnë djalin në spitalin pediatrik, ku mjekët, duke parë gjendjen kritike, e dërguan në reanimacion.
Pavarësisht përpjekjeve të mjekëve për ta shpëtuar, fëmija vdiq pas dy ditësh. Prindërit raportuan se djali kishte rënë në gjendje kome pas anestezisë. Ngjarja ka tronditur opinionin publik dhe ka ngritur shqetësime mbi sigurinë e trajtimeve dentare me anestezi totale në klinikat private.
Ky rast thekson nevojën për rregullim më të fortë në fushën e shëndetësisë dhe mbrojtjen e të drejtave të pacientëve, veçanërisht kur bëhet fjalë për fëmijët.
