Kuvendi i Shqipërisë ka votuar me 101 vota pro, të shumicës dhe opozitës dhe një abstenim rezolutën që dënon sulmin në veri të Kosovës ku u vra efektivi i policisë, Afrim Bunjaku. Kryeministri Edi Rama mungoi në votim.
Vota abstenim ishte e Kreshnik Çollakut nga krahu i Lulzim Bashës, pasi e cilësoi të “thatë” që nuk e adreson plotësisht thelbin.
Rezoluta thekson rëndësinë e mbrojtjes së integritetit territorial të Kosovës. Kërkohet hetim ndërkombëtar për sulmin e 24 shtatorit, si dhe faktin që qeveria e Kosovës të punojë me aleatët ndërkombëtarë, SHBA-BE.
Por më pas opozita ka tentuar që të bllokojë foltoren e parlamentit pasi kundërshton votimin e seancës së rendit të javës së kaluar, ku deputetët e PD-së nuk e lejuan.
PS rrëzoi tre kërkesat e opozitës për ngritjen e komisioneve hetimore dhe ndryshimin e përbërjes së komisionit për reformën zgjedhore.
Kryetarja e Kuvendit, Lindita Nikolla me ndihmën e gardës që u fut në sallë vijoi dhe votoi pikat e rendit të ditës së javës së kaluar dhe të sotmet. Në fund Nikolla lexoi dy njoftime.
Së pari njoftimin e kryetarit të grupit të PD-së, Gazment Bardhi që rikthen Oerd Bylykbashin në grup pas pezullimit nga Lulzim Basha vitin e kaluar.
Gjithashtu lexoi edhe njoftimin e Lulzim Bashës në cilësinë e kryetarit të PD-së që përjashton Bardhin nga grupi i PD-së. Kjo shkaktoi kundërshti në sallën e parlamentit.
