Mira Murati, një sipërmarrëse shqiptare, ka arritur një marrëveshje të rëndësishme me gjigantin amerikan të çipave Nvidia, për furnizimin me procesorë të avancuar për inteligjencën artificiale. Partneriteti, që mund të arrijë vlera deri në dhjetëra miliarda dollarë, do të ndihmojë startup-in e Muratit, Thinking Machines, në ndërtimin e infrastrukturës së nevojshme për zhvillimin e AI.
Sipas raporteve nga Financial Times dhe Reuters, Thinking Machines do të përdorë teknologjinë e njoftuar nga Nvidia, çipat e gjeneratës së ardhshme “Vera Rubin”, për të ndërtuar qendra të dhënash të avancuara. Kompania, me seli në San Francisko, njoftoi se partneriteti parashikon instalimin e të paktën një gigavati kapacitet kompjuterik në këto qendra, një proces që kërkon investime të konsiderueshme. Vlerësimet e kompanisë sugjeronin se ndërtimi i një qendre për inteligjencën artificiale mund të kapë vlerën prej 50–60 miliardë dollarësh, me një pjesë të madhe të kostos të lidhur me pajisjet e Nvidia.
Murati theksoi se teknologjia e Nvidia është themeli i industrisë së inteligjencës artificiale. Startup-i i saj, që u themelua rreth një vit më parë, po zhvillon platformën Tinker. Kjo platformë u mundëson kompanive të personalizojnë modele të mëdha gjuhësore pa nevojën për të krijuar infrastrukturë komplekse për trajnimin e tyre.
Drejtori ekzekutiv i Nvidia, Jensen Huang, e përshkroi këtë marrëveshje si një mundësi për të bashkëpunuar me Thinking Machines në zhvillimin e gjeneratës së ardhshme të teknologjive të inteligjencës artificiale. Kjo bashkëpunim premton të sjellë inovacione të reja dhe të forcojë pozitat e të dyja kompanive në tregun global të AI.
