Ministrja për Evropën dhe Punët e Jashtme, Elisa Spiropali, ka arritur këtë të mërkurë në Belfast, Irlandë e Veriut, për t’u angazhuar në Takimin e Ministrave të Jashtëm të Procesit të Berlinit. Ajo theksoi se qyteti përfaqëson një shembull të fuqishëm të dialogut dhe bashkëpunimit për tejkalimin e ndarjeve.
Spiropali shpalli se qëllimi i saj është të transmetojë frymën e dialogut që është ndërtuar në Belfast në Ballkanin Perëndimor. Ajo nënvizoi rëndësinë e ndërtimit të paqes, duke theksuar se kjo nuk është një trashëgimi, por një proces i vazhdueshëm që kërkon angazhim dhe reformë. Shqipëria, sipas saj, ka marr një rol udhëheqës në këtë proces, përmes reformave dhe angazhimeve konkrete.
Gjatë këtij ministeriali, Ministrja Spiropali do të zhvillojë takime bilaterale të rëndësishme dhe do të ketë rolin e folëses kryesore në disa sesione plenare. Këto sesione do të përfshijnë tema si siguria europiane, migrimi, pajtimi në Ballkanin Perëndimor dhe integrimi i rajonit në Bashkimin Europian.
Ky Ministerial është organizuar nga Sekretarja e Jashtme e Mbretërisë së Bashkuar, Yvette Cooper, dhe është pjesë e një serie takimesh në nivel ministror që Britania e Madhe po organizon në kuadër të Procesit të Berlinit 2025. Temat e këtyre takimeve përfshijnë politika të jashtme dhe të brendshme, si dhe çështje ekonomike.
Takimet do të kulmojnë me Samitin e Liderëve të thirrur nga Kryeministri britanik në Londër më 22 tetor 2025, ku pritet të diskutohen në detaje rezultatet e këtyre bisedimeve dhe hapat e ardhshëm për integrimin e rajonit të Ballkanit Perëndimor në Bashkimin Europian.
