Ministrja e Shëndetësisë, Evis Sala, ka inspektuar spitalin e ri të Lezhës, i transformuar falë një investimi të qeverisë shqiptare dhe Bankës Botërore. Gjatë kësaj vizite, ajo theksoi rëndësinë e infrastrukturës shëndetësore për sigurimin e shërbimeve cilësore për pacientët.
“Investime të tilla në infrastrukturë dhe pajisje mjekësore të teknologjisë së lartë mundësojnë shërbime më të mira për qytetarët, forcojnë autonominë spitalore dhe përgatisin spitalin për të ofruar shërbime në nivel terciar, duke i kthyer në qendra referimi për rajonin,” ka deklaruar ministrja Sala.
Spitali Rajonal i Lezhës disponon një kapacitet prej 162 shtretërish dhe ka 324 profesionistë shëndetësorë në gatishmëri, duke u shndërruar në pikën kryesore të referimit shëndetësor në këtë rajon. Ai ofron shërbime të specializuara, duke përfshirë klinike, diagnostikuese dhe kirurgjikale për komunitetin.
Përfundimi i rikonstruksionit të godinave dhe renovimi i ambienteve, së bashku me instalimin e pajisjeve mjekësore inovative, kanë garantuar vendosjen në funksionalitet të plotë të spitalit. Kjo ka lejuar rritjen e kapaciteteve dhe përmirësimin e kushteve për trajtimin e pacientëve në përputhje me standardet bashkëkohore.
