Ministri izraelit i Financave, Bezalel Smotrich, ka bërë thirrje për aneksimin e pjesëve të Rripit të Gazës në rast se Hamasi, organizata palestineze e shpallur terroriste nga SHBA dhe BE, refuzon të dorëzohet. Gjatë një konference në Jerusalem, Smotrich, një figurë me pikëpamje ekstremisht të djathta, prezantoi planin e tij për “fitore në Gazë deri në fund të vitit” dhe propozoi një ultimatum për Hamasin për t’u dorëzuar, çarmatosur dhe liruar pengjet.
Ai sugjeroi që, nëse Hamasi refuzon, Izraeli duhet të aneksojë një pjesë të territorit çdo javë, duke përfunduar këtë proces brenda katër javësh për të vendosur kontrollin e plotë mbi Gazën. Smotrich përmendi se palestinezët do të duhet të zhvendosen në jug të Gazës, ndërsa Izraeli do të rrethonte pjesën veriore e qendrore për të eliminuar militantët e mbetur.
Deklaratat e tij vijnë në një moment kur forcat izraelite po zhvillojnë një ofensivë për të fituar kontrollin mbi Qytetin e Gazës, pavarësisht shqetësimeve për fatin e civilëve, shumica e të cilëve janë zhvendosur gjatë konfliktit. Smotrich e inkurajoi kryeministrin Benjamin Netanyahu të miratoj planin e tij pa vonesa.
Ai gjithashtu shprehu mbështetje për rivendosjen e vendbanimeve në Gaza, një proces që përfshin kthimin e trupave dhe kolonëve izraelitë në një territor nga i cili ishin tërhequr në vitin 2005. Smotrich është një mbështetës i lëvizjes koloniale dhe ka autorizuar projekte të ndryshme në Bregun Perëndimor, njëra prej të cilave rrezikon integritetin e një shteti të ardhshëm palestinez. Ai e përshkroi projektin në zonën E1, lindje të Jerusalemit, si një përpjekje për të “varrosur idenë për një shtet palestinez”.
Kjo situatë krijon një ambient të tensionuar, me ndikime të thella në marrëdhëniet izraelito-palestineze dhe në stabilitetin rajonal.
