Burime të besueshme pohojnë për portalin Timoni.al se kërkojnë që të bëhet transparencë e plotë mbi kontratën me të cilën është dhënë me koncesion Miniera e Spaçit, pasi dyshohet se ajo është në shkelje të plotë të ligjit dhe favorizon kompaninë turke që e administron.
Sipas informacioneve të siguruara, kontrata është përdorur si garanci peng në Bankën BKT, institucion me kapital turk, për të marrë një kredi prej 8 milionë eurosh, me miratimin e ministres së Infrastrukturës dhe Energjisë, Belinda Balluku.
Alarmi publik shtohet edhe më shumë nga fakti se pronarët e kompanisë turke “Tete Albania”, e cila operon në minierën e Spaçit, janë arrestuar në Turqi dhe pasuritë e tyre janë konfiskuar nga shteti turk.
“Tete Albania” është në pronesi të “Ilbak Holding”, një grup i madh industrial turk që, sipas raportimeve, është në administrim shtetëror pas sekuestrimit nga autoritetet turke.
Për këtë arsye, ngrihen pyetje të drejta e të rëndësishme për autoritetet shqiptare:
👉 A është informuar zyrtarisht Qeveria Shqiptare mbi statusin ligjor të “Tete Albania”?
👉 A është konfiskuar edhe kjo kompani nga shteti turk, duke kaluar nën administrim shtetëror të huaj ndërkohë që menaxhon një pasuri minerare shqiptare?
👉 Dhe nëse po, si është e mundur që një kompani e sekuestruar në Turqi të vijojë të mbajë nën kontroll një nga minierat më të rëndësishme të Shqipërisë?
Publiku dhe minatorët e Spaçit kërkojnë hetim të menjëhershëm dhe transparencë të plotë mbi këtë aferë që mund të përbëjë një tjetër skandal të rëndë në sektorin e energjisë dhe mineraleve.
