TIRANA– Kontrolli i Lartë i Shtetit ka publikuar raportin e auditimin të kryer në doganën e aeroportit të Rinasit. Sipas raportit, KLSH duket se ka evidentuar një dëm prej miliona lekësh ndaj buxhetit të shtetit për periudhën 1 korrik 2022 deri më 31 dhjetor të vitit 2024.
KLSH ka zbuluar disa parregullsi në vlerësimin e mallrave, zbatimin e TVSH-së, procedurat doganore dhe administrimin financiar. Bazuar në raport mallrat me të cilët është abuzuar më shumë dhe për të cilët sipas KLSH-së në dijeni është edhe Drejtoria e Përgjithshme e Doganave, janë pajisjet mjekësore si dhe telefonat celularë.
Sipas KLSH grupi i auditimit ka konstatuar 13 gjetje dhe ka dhënë 13 rekomandime, për masa organizative 8 rekomandime. Në dokument thuhet se gjatë vitit 2023 në Degën Doganore Rinas për artikujt e këtij kapitulli janë përpunuar 275 deklarata me vlerë të deklaruar 603,796,236 lekë dhe kanë rezultuar 8 deklarata të përpunuara në procedurat e ndjekura për vlerësimin e mallrave për qëllime doganore me mangësi. Sipas raportit, efekti financiar i përllogaritur rezulton 1,639,480 lekë e cila përbën të ardhura të munguar në Buxhetin e Shtetit.
Pjesë nga raporti i KLSH:
Nga auditimi i realizuar mbi performancën e të ardhurave doganore të Degës së Doganës Rinas, në krahasim me planin e parashikuar, u konstatua se për periudhën 2022–2024, të ardhurat doganore në total janë realizuar mbi pritshmëritë, duke rezultuar në një tejkalim të planit të përcaktuar, konkretisht: për vitin 2022 me një realizim në masën 103%, ku janë realizuar të ardhura në vlerën 2,777,356 mijë lekë, kundrejt planifikimit në vlerën 2,693,396 mijë lekë; për vitin 2023 me një realizim në masën 103%, ku janë realizuar të ardhura në vlerën 3,209,097 mijë lekë, kundrejt planifikimit në vlerën 3,101,230 mijë lekë; për vitin 2024 me një realizim në masën 117%, ku janë realizuar të ardhura në vlerën 3,745,463 mijë lekë, kundrejt planifikimit në vlerën 3,201,279 mijë lekë.
Me mos realizim rezultojnë të ardhurat nga taksa doganore, të cilat për vitin 2024 paraqiten me një mosrealizim në vlerën – 4,271 mijë lekë ose në realizim në masën 98%. Me mosrealizim paraqiten të ardhurat nga akciza për vitet 2022-2024, të cilat konkretisht rezultojnë me mosrealizim në vlerën -13,266 mijë lekë ose realizim në masën 80% për vitin 2022, mosrealizim në vlerën -14,356 mijë lekë ose realizim në masën 66% për vitin 2023 dhe mosrealizim në vlerën -4,303 mijë lekë ose realizim në masën 86% për vitin 2024 kundrejt planit, ku ndër faktorët që kanë ndikuar në mosrealizimin e këtij zëri është ndryshimi i kursit të këmbimit nëpërmjet mbi çmimit të lekut.
Konstatohet se pavarësisht uljes së planit të të ardhurave nga akciza vit pas viti i pashoqëruar me analiza konkrete, keq planifikimi si pasojë e mospërfshirjes së Degës Doganore Rinas në vendimmarrje mbi këtë proces që përcillet për zbatim nga Drejtoria e Përgjithshme e Doganave, ka ndikuar drejtpërsëdrejti në mos realizimin e të ardhurave nga akciza.
