Me finalen spektakolare të hokejit mbi akull, u përmbyllën zyrtarisht Lojërat Olimpike Dimërore ‘Milano Cortina 2026’, që u zhvilluan nga 6 shkurti në disa zona të Italisë veriore. Shtetet e Bashkuara të Amerikës fituan finales, por kjo nuk mjaftoi për t’u shpallur kombëtarja më e suksesshme në garat e këtij edicioni. Norvegjia, me 18 medalje të arta, 12 të argjendta dhe 11 të bronzta, kryesoi renditjen, duke vendosur një rekord të ri olimpik për numrin e medaljeve të arta të fituara në një edicion të Lojërave Dimërore. Kjo përfaqëson herën e katërt radhazi që norvegjezët dominuan në tabelën e medaljeve.
Pas Norvegjisë, SHBA renditet e dyta me 12 medalje të arta, po aq të argjendta dhe nëntë të bronzta, duke arritur një total prej 33 medaljesh. Holanda dhe Italia ndanë nga dhjetë medalje të arta, ndërsa Gjermania, Franca dhe Suedia fituan nga tetë. Zvicra mbetet në vendin e tetë me gjashtë medalje të arta.
Në disiplinat e skijimit alpin, Zvicra ishte lideri, me katër medalje të arta dhe tre të argjendta. Italia dhe SHBA ndanë dy medalje të arta, ndërsa Austria dhe Brazili siguruan nga një medalje të artë.
Në këtë edicion morën pjesë 2871 sportistë nga 92 shtete. Shqipëria dhe Kosova përfaqësuan veten, por pa arritur rezultatet e pritura. Për Shqipërinë garuan Denni Xhepa, Lara Colturi, Semire Dauti dhe Lisa Brunga. Lara Colturi u rendit e 16-ta në Slalomin Gjigant dhe e 10-ta në Slalom, ndërsa Denni Xhepa përfundoi në vendin e 34-t në si në Super-G, ashtu edhe në Slalomin Gjigant. Semire Dauti dhe Lisa Brunga u mjaftuan vetëm me pjesëmarrjen.
Kosova u përfaqësua nga Kiana Kryeziu, e cila garoi në tri disiplina të skijimit alpin, dhe Drin Kokaj, por të dy u eliminuan nga gara. Mbrëmjen e sotme u zhvillua ceremonia e mbylljes në ‘Arenën e Veronës’. Lojërat e ardhshme Olimpike Dimërore do të mbahen në vitin 2030 në Alpet Franceze.
