Përfaqësuesit e Serbisë kanë qëndruar në sallën e Organizatës për Siguri dhe Bashkëpunim në Evropë (OSBE) në Vjenë, kur përfaqësuesit e Bashkimit Evropian dhe të vendeve të tjera janë larguar nga takimi ,në shenjë proteste pas deklaratave të Rusisë për pushtimin rus.
Siç mëson Radio Evropa e Lirë (REL), në një takim të brendshëm të OSBE-së në Vjenë për luftën në Ukrainë, të mbajtur më 24 shkurt, Rusia ka këmbëngulur në interpretimet e saj për pushtimin e Ukrainës, pas të cilit veprim përfaqësuesit e vendeve perëndimore janë larguar nga takimi.
Përfaqësuesit nga Serbia kanë qenë në mesin e disa përfaqësuesve të disa vendeve që nuk janë larguar nga takimi.
Vendet që kanë qëndruar me Rusinë, përveç Serbisë, janë: Bjellorusia, Armenia, Azerbajxhani, Kazakistani, Taxhikistani dhe Turkmenistani.
Në takim kanë mbetur edhe përfaqësues të Selisë së Shenjtë dhe ata të Asamblesë Parlamentare të OSBE-së.
Sulmi i Moskës ndaj Ukrainës ka nisur në orët e para të 24 shkurtit.
Raketat janë nisur në aeroporte dhe infrastrukturë ushtarake në rreth 25 qytete.
Presidenti rus, Vladimir Putin ka urdhëruar “operacion special” për të çmilitarizuar Ukrainën.
Veprimi i Kremlinit ka nxitur zemërim dhe është dënuar në gjithë botën.
Shtetet e Bashkuara dhe aleatët janë përgjigjur me sanksione të ashpra kundër Moskës.
Beogradi zyrtar ende nuk e ka bërë të ditur qëndrimin e tij në lidhje me sulmet ruse në Ukrainë. Mediat në Serbi kanë raportuar se presidenti i Serbisë, Aleksandar Vuçiq, do të shpallë qëndrimin e tij mbrëmjen e 25 shkurtit.
Serbia dhe Rusia ruajnë marrëdhënie të nivelit më të lartë.
Beogradi zyrtar refuzon të harmonizojë politikën e tij me atë evropiane, edhe pse Serbia është kandidate për anëtarësim në Bashkimin Evropian.
Rusia po e mbështet Serbinë duke bllokuar anëtarësimin e Kosovës në organizata ndërkombëtare.
Kosova shpalli pavarësinë në vitin 2008, por zyrtarët serbë refuzojnë ta njohin atë si shtet.
Serbia është, gjithashtu, plotësisht e varur nga gazi rus, të cilin e merr përmes Rrjedhës Turke./REL
