Presidenti i Partisë së Lirisë, Ilir Meta, ka reaguar nga burgu lidhur me pjesëmarrjen e forcës politike që ai drejton në koalicionin opozitar “Aleanca për Shqipërinë Madhështore”. Meta ka theksuar se ky koalicion është gjithëpërfshirës dhe synon fitoren dhe ndryshimin që pritet më 11 maj.
Në një postim në rrjetet sociale, ai u bëri thirrje emigrantëve që të regjistrohen për të votuar, për të “ndëshkuar sektin që dëboi mbi 1 milion shqiptarë në emigrim”.
“Falenderoj Kryesinë e Partisë së Lirisë, që miratoi sonte me unanimitet marrëveshjen për hyrjen në koalicionin opozitar gjithëpërfshirës “Partia Demokratike – Aleanca për Shqipërinë Madhështore”.
Në funksion të Fitores dhe Ndryshimit të shumëpritur më 11 Maj, çdo anëtar dhe simpatizant i Partisë së Lirisë, brenda por edhe jashtë vendit, do të japë kontributin e tij maksimal për shkuljen nga themelet të Narkoshtetit të kalbur, të korruptuar dhe të inkriminuar në çdo qelizë.
U bëj thirrje të gjithë bashkëatdhetarëve tanë në diasporë, që në këto orë të mbetura të regjistrohen për të votuar më 11 Maj për të ndëshkuar sektin që dëboi mbi 1 milion shqiptarë në emigrim dhe që nga paniku po tenton çdo manovër për të penguar votën e tyre.
Vota masive e shqiptarëve për koalicionin gjithëpërfshirës opozitar “Partia Demokratike – Aleanca për Shqipërinë Madhështore” do të sjellë Ndryshimin. FITORE!”, shkruan Meta.
