Një gjykatë spanjolle ka vendosur që Meta, kompania mëmë e Facebook-ut dhe Instagram-it, të paguajë më shumë se 540 milionë euro për shkelje të rregullave të konkurrencës dhe mbrojtjes së të dhënave. Ky akt konsiderohet si një vendim historik për sektorin e mediave lokale.
Padia e ngritur ndaj gjigantit të teknologjisë përfshinte përdorimin e të dhënave të përdoruesve nga viti 2018 deri në 2023 pa pëlqimin e tyre, për të krijuar profile të reklamimit dhe për të gjeneruar të ardhura në dëm të mediave spanjolle që respektonin ligjet e privatësisë. Kjo padi u mbështetet nga disa media, duke përfshirë anëtarët e Shoqatës së Medias (AMI), të cilët e vlerësuan vendimin si një arritje të rëndësishme për gazetarinë dhe demokracinë.
Gjykata Tregtare e Madridit urdhëroi Metën të paguajë 479 milionë euro për 87 botues spanjollë të mediave dixhitale dhe agjenci lajmesh anëtare të AMI-t, për shkak të avantazhit të paligjshëm në reklamimin në platformat e saj sociale. Vendimi përfshin gjithashtu mbi 60 milionë euro në interesa të papaguara dhe kompensim për agjencinë Europa Press, e cila nuk është anëtare e AMI-t.
Meta njoftoi se do të apelojë këtë vendim, të cilin e konsideron “të pabazuar” dhe që “injoron mënyrën se si funksionon industria e reklamave online.” Kompania theksoi se përputhet me të gjitha ligjet dhe ofron përdoruesve mjetet për të kontrolluar përvojën e tyre në shërbimet e saj.
Ky rast tregon tensionin në rritje midis gjigantëve të teknologjisë dhe mediave tradicionale në lidhje me përdorimin e të dhënave dhe shpërndarjen e të ardhurave nga reklamat, çështje që po bëhen gjithnjë e më të rëndësishme në epokën digjitale.
