Dritan Zaimi, mësues i anglishtes në shkollën Gustav Mayer në Tiranë, është i lidhur me një grupim fetar të panjohur ligjërisht në Shqipëri, Kisha Online Ndërkombëtare, ku ai ka ndjekur lucra e alketa Auer. Sipas një hulumtimi të bërë nga gazetarja Kristi Gongo e Top Channel, Zaimi dhe Auer janë njohur në vitet ’90, por kanë rinisur kontaktet në vitin 2020, nga ku dyshohet se ka filluar indoktrinimi fetar i fëmijëve.
Materialet e publikuara nga Top Channel zbulojnë se fëmijët angazhoheshin në detyra shtëpie lidhur me urdhërimet e perëndisë dhe ishin të vlerësuar më së larti, me nota 10. Disa prindër gjithashtu akuzojnë Zaimin për predikimin e fesë së “dëshmitarët e Jehovait”. Sipas postimeve të tij në rrjetet sociale, Zaimi e përmend besimin e tij në Yahushua, një interpretim hebraik i Jezusit, dhe ai shpreh një retorikë alarmante për ata që nuk besojnë.
Në një prej postimeve, ai shkruan: “Tani do të lëkunden themelet e çdokujt që rebelohet ndaj Zotit të gjallë dhe të vërtetë, Jezus Krisht. OSE DO TI NDËNSHTROHENI BIRIT, OSE DO TË SHKATËRROHENI.”
Përveç aktiviteteve online, grupimi ka një strehëz në Astir, ku organizohen takime dhe evente, përfshirë shërimin e të sëmurëve dhe pagëzime, në të cilat përfshin edhe fëmijë. Këto aktivitete dhe praktika kanë sjellë shqetësim në komunitet, duke grumbulluar kritika mbi karakterin dhe ndikimin e tyre në zhvillimin e fëmijëve.
