Ylber Ramadani, mesfushori i kombëtares shqiptare dhe lojtar i Lecce-s, ndau përvojat e tij në elitën e futbollit italian në një dokumentar të Serie A. Ai e theksoi udhëtimin e tij të gjatë drejt stabilitetit, duke përshkruar momentet e vështira dhe mbështetjen vendimtare të familjes, veçanërisht të babait të tij.
Ramadani përmendi se ka udhëtuar shumë gjatë karrierës së tij dhe ka mësuar nga kultura të ndryshme. Në Lecce, ai ndihet si në shtëpi, për shkak të ambientit të bukur dhe klimës së këndshme. Ai vuri në dukje se presioni për të mbijetuar në kampionatin italian është i lartë, sidomos kur rezultatet nuk janë sipas pritshmërive, por ndjen se ka mësuar shumë.
Roli i babait në karrierën e tij ishte i rëndësishëm. Në fillim, ai nuk e mbështeste futbollin si një zgjedhje për Ylberin, por më pas u bë mbështetësi i tij më i madh. “Gjithmonë e falënderoj babanë tim, sepse më pas ai u bë krahu im i djathtë,” shprehet Ramadani.
Ai gjithashtu theksoi mbështetjen e tifozëve të Lecce-s, të cilët i kanë dedikuar këngë dy futbollistëve shqiptarë në skuadër. “Është një ndjenjë e bukur, sepse e ndiejmë pasionin e tyre. Bashkë me Medon Berisha, duam t’ua shpërblejmë këtë besim duke mbajtur ekipin në Serie A,” tha ai.
Ramadani vuri në dukje se mungesa e Berishës është e ndjeshme për skuadrën, duke referuar cilësitë e tij si kritikë për lojën e Lecce-s. Me tre vite në klub dhe një kontratë që pritet të zgjatet automatikisht për një sezon tjetër, Ramadani ka cementuar pozitat e tij si një titullar i rëndësishëm për Lecce-n.
