Qyteti i dytë më i madh në Shtetet e Bashkuara është vendosur nën shtetrrethim për natën e dytë radhazi, teksa tensionet vazhdojnë të përshkallëzohen pas bastisjeve të emigracionit të urdhëruara nga administrata federale.
Protestat e nisura të premten kanë çuar në përplasje të dhunshme me forcat e rendit, me mbi 400 persona të arrestuar, përfshirë 330 migrantë pa dokumente dhe dhjetëra të tjerë për akte dhune, përfshirë tentativë për vrasje të një oficeri policie.
Kryetarja e bashkisë së Los Anxhelosit, Karen Bass, njoftoi për shtetrrethimin që fillon çdo mbrëmje nga ora 20:00, duke thënë se masat janë marrë për të ndalur “aktorët e këqij që po përfitojnë nga përshkallëzimi i situatës së nxitur nga qeveria federale”.
Bass kritikoi hapur presidentin Donald Trump për bastisjet e koordinuara nga Shërbimi i Emigracionit, të cilat, sipas saj, kanë krijuar “frikë, panik dhe destabilitet në komunitetet lokale”.
Gjatë natës, policia ka kryer “arrestime masive”, duke përfshirë qindra persona për shkelje të orës policore, posedim armësh dhe akte dhune. Dy oficerë policie janë plagosur gjatë përplasjeve.
Ndërkohë, në qytet janë vendosur 4,000 trupa të Gardës Kombëtare dhe 700 marinsa, disa prej të cilëve tashmë janë autorizuar të ndalojnë protestuesit derisa të ndërhyjë policia.
