Një tragjedi e rëndë ka ndodhur në një klub nate në Goa, Indi, ku të paktën 25 persona kanë humbur jetën si pasojë e një zjarri të madh që shpërtheu rreth mesnatës. Midis viktimave janë edhe disa turistë, kurse shumica e atyre që humbën jetën ishin punëtorë të klubit.
Kryeministri i Goas, Pramod Sauant, e përshkroi ditën si shumë të dhimbshme dhe lajmëroi se ka urdhëruar një hetim të detajuar mbi incidentin. Ai theksoi se ata që do të rezultojnë përgjegjës do të përballen me sanksione të ashpra sipas ligjit, duke e konsideruar çdo lloj neglizhence si të papranueshme.
Sipas informacioneve paraprake nga policia, zjarri dyshohet se filloi në katin e parë të ndërtesës, duke u përhapur më pas në pjesën tjetër. Shumica nga ata që humbën jetën janë bllokuar në zonën e bodrumit dhe kanë ndërruar jetë nga tymi. Zjarrfikësit punuan gjatë gjithë natës për të shuar flakët dhe për të shpëtuar ata që ishin bllokuar.
Goa, e njohur për jetën e saj të natës, plazhet e bukura dhe atmosferën relaksuese, është një destinacion turistik i njohur. Rreth 5.5 milionë turistë vizituan Goën gjatë gjysmës së parë të këtij viti, përfshirë 270,000 vizitorë nga jashtë vendit. Kjo tragjedi e fundit ka tronditur jo vetëm banorët e Goas, por edhe turistët që e vizitojnë këtë rajon për relaks dhe argëtim.
