Megi Doçi, sulmuesja e Kombëtares shqiptare dhe e Vllaznisë, është shpallur fituese e çmimit prestigjioz “Topi i Artë” për vajza 2025, duke e bërë këtë trofe të tretin në karrierën e saj. Me këtë arritje, ajo pozicionohet si një nga futbollistet më të njohura në historinë e futbollit të vajzave në Shqipëri.
Në garën për këtë çmim ishin edhe futbollistet Xhesika Ndoj, Arbiona Bajraktari dhe Xhulia Xhindole. Trofeu iu dorëzua Doçit nga anëtarja e Komitetit Ekzekutiv, Anila Basha. Pas marrjes së çmimit, Doçi shprehu lumturinë për rikthimin e saj tek ky trofe dhe ia dedikoi këtë arritje familjes dhe klubit të Vllaznisë.
Më herët, Doçi kishte fituar edhe titullin “Këpuca e Artë” për vajzat për edicionin 2024-2025, që përcaktohet në bazë të golave të shënuar. Me 83 gola të realizuar gjatë sezonit me Vllazninë, ajo kryeson listën e golashënuesve në kategorinë e vajzave.
Çmimi “Topi i Artë 2025” iu dorëzua Doçit gjatë mbrëmjes Gala që po zhvillohet në Teatrin Kombëtar të Operas dhe Balletit, ku i pranishëm ishte edhe ish-mesfushori i Kombëtares, Ervin Skela. Kjo ngjarje thekson rëndësinë e arritjeve sportive dhe nxit pasionin për futbollin femëror në Shqipëri.
