Mijëra iranianë kanë dalë në rrugë në protestë që nga vdekja javën e kaluar e 22-vjeçares Mahsa Amini, për shkak të mosmbajtjes së hixhabit siç duhet.
Që nga e premtja, janë zhvilluar demonstrata në të paktën 40 qytete në mbarë vendin, duke përfshirë kryeqytetin Teheran, me protestues që kërkojnë t’i jepet fund dhunës dhe diskriminimit ndaj grave, si dhe t’i jepet fund veshjes së detyrueshme të hixhabit. Dhjetra protestues janë vrarë në përleshjet me forcat e sigurisë.
Autoritetet iraniane thonë se do të kufizojnë aksesin në internet në vend derisa të rivendoset qetësia në rrugë.
Autoritetet shpresojnë se duke kufizuar internetin ata mund të kontrollojnë protestat e fundit në një valë që ka përfshirë Iranin vitet e fundit.
Por protestat e këtij viti janë të ndryshme në shtrirjen, shkallën dhe natyrën e paprecedentë feministe. Ekziston gjithashtu mobilizim përtej ndarjes socio-ekonomike. Një brez i ri iranianësh po ngrihen në rrugë kundër dekadave të represionit ndoshta më të guximshëm se kurrë.
Demonstratat janë përhapur në dhjetëra qytete iraniane, nga rajoni kurd në veriperëndim, në kryeqytetin Teheran dhe madje edhe në qytete më tradicionalisht konservatore si Mashhad.
Thirrjet fillestare për llogari janë kthyer në kërkesa për më shumë të drejta dhe liri, veçanërisht për gratë që për dekada që nga Revolucioni Islamik i vitit 1979 janë përballur me diskriminim dhe kufizime të rënda të të drejtave të tyre.
