Presidenti amerikan Donald Trump ka njoftuar planin për dërgimin e trupave të Gardës Kombëtare në qytete të mëdha të drejtuara nga demokratët, përfshirë Chicago dhe New York, duke e quajtur këtë një “goditje ndaj krimit”. Ky vendim ka shkaktuar reagime të forta në SHBA, në mënyrë të veçantë nga guvernatorët dhe kryetarët e qyteteve.
Guvernatori demokrat i Illinois, JB Pritzker, e quajti këtë veprimin e presidentit një “abuzim me pushtetin”, duke theksuar se nuk ka asnjë emergjencë që justifikon dërgimin e trupave federale. Sipas tij, Trump është duke “prodhur një krizë të rreme”. Në të njëjtën linjë, kryebashkiaku i Chicagos, Brandon Johnson, shprehu shqetësimin për dislokimin e trupave, duke e cilësuar planin si “të paorganizuar, të panevojshëm dhe të papërgjegjshëm”. Ai paralajmëroi se një “dislokim i paligjshëm” mund të çojë në rritjen e tensioneve mes banorëve dhe forcave të policisë, duke rrezikuar përparimin në uljen e kriminalitetit.
Ndërkohë, në Washington, DC, ku tashmë janë dislokuar rreth 2,000 trupa të Gardës Kombëtare, sekretari amerikan i Mbrojtjes, Pete Hegseth, urdhëroi patrullimin e armatosur të këtyre trupave, ndryshe nga ç’kishte njoftuar më parë Pentagoni. Trupat janë vendosur në pika kyçe të kryeqytetit si National Mall dhe Union Station, por ende nuk janë angazhuar në operacione policore.
Trump e cilësoi misionin në Washington si “një sukses të madh”, duke thënë se kryeqyteti ka kaluar nga një “hellhole” në një vend të sigurt. Ai paralajmëroi gjithashtu mundësinë për shpalljen e një gjendjeje emergjente kombëtare, duke u dhënë trupave mundësi të qëndrojnë më gjatë se afati 30-ditor.
Sipas raportimeve, rreth 1,700 trupa të Gardës Kombëtare pritet të dislokohen në 19 shtete, së bashku me operacionet e Immigration and Customs Enforcement. Megjithatë, një sondazh nga Washington Post tregon se 80% e banorëve të Washington, DC, janë kundër dislokimit të trupave federale dhe të Gardës Kombëtare. Administrata Trump e mbështet këtë operacion, duke theksuar se janë bërë mbi 700 arrestime dhe janë sekuestruar armë të paligjshme.
