TIRANA– Për t’i shprehur ngushëllimet familjarëve të ish-deputetit demokrat, Gerti Bogdani, që ndërroi jetë dje, kanë marrë pjesë në homazhe vajza dhe bashkëshortja e kreut të PD-së, Argita Malltezi e Liri Berisha. Homazhet në ambientet e Kuvendit nisën në orën 10:00 dhe do të përfundojnë në orën 12:00.
Më pas, arkëmorti me trupin e pajetë të ish-deputetit do të përcillet për në banesën e fundit, në varrezat e Sharrës. Nga pamjet e siguruara vërehen deputetët e Partisë Demokratike që kanë mbërritur si edhe familjarët e Bogdanit.
Seanca parlamentare që ishte programuar të niste të enjten në orën 10:00 është shtyrë në orën 17:00. Partia Demokratike njoftoi se ka shpallur të enjten ditë zie dhe ka pezulluar të gjitha aktivitetet partiake në të gjithë vendin.
