TIRANË– Ka përfunduar pas dy orësh protesta e organizuar para bashkisë së Tiranës. Qytetarët janë larguar nga bashkia, ndërsa një pjesë e tyre kanë shkuar te selia e Partisë Demokratike.
Sekretari i Përgjithshëm i PD, Flamur Noka, deklaroi pas mbylljes së protestës se protestat do të vazhdojnë.
“PD është selia e njerëzve të lirë. Aty e kemi shtëpinë, është shtëpia e demokratëve, aty do të shkojmë. Protesta do të vijojë gjer në momentin që kreu i organizatës kriminale 5D të japë llogari përpara drejtësisë. Protesta e qytetarëve të Tiranës nuk do njohë të ndalur. I them Edi Ramës një shprehje që e ka përdorur vetë: akoma nuk ke parë gjë. Do të ketë edhe më shumë. Ndaj hiq duart nga drejtësia, liro drejtësinë në mënyrë që kreu i organizatës kriminale 5D, Erion Veliaj të shkojë përpara drejtësisë.
Nuk mund të qeveriset Tirana nga një bandë kriminale. Vetëm se Altin Dumani i mbyll sytë se është në shërbim të organizatës kriminale. Qytetarët e Tiranës kërkojnë kokën e Erion Veliajt. Koka e Erion Veliajt duhet të shkojë përpara drejtësisë. E gjitha kjo është për të dhënë një sinjal nga drejtësia që po luftohet korrupsioni dhe jo vetëm opozita,” deklaroi ai.
Ndërkohë drejtuesit e opozitës thanë se protesta e radhës do mbahet të martën në ora 16:30. Kjo për shkak se të premten janë Pashkët ortodokse. Po ashtu të martën pasdite do mbahet edhe mbledhja e Këshillit Bashkiak.
