Është mbyllur procesi i votimit për zgjedhjen e kreut të ri të PD-së, ku garuan ish-kryetari Lulzim Basha dhe Gjargji Hani, nga shtresa e ish-të përndjekurve politikë.
Në një deklaratë për mediat pas orarit zyrtar të përfundimit të procesit, Jemin Gjana tha se mund të votojnë edhe ata që vijnë në çastet e fundit pas orës 19:00 për shkak të fluksit që sipas tij sjellin orët e pasdites.
Gjana shtoi se të dhënat e orës 17:00 trgojnë se kanë votuar 13 700 demokratë e thënë ndryshe rreth 54 %.
“Me të dhënat e orës 17:00 shifra është diku te 13 700 votues, që do të thotë rreth 54 % pjesëmarrje. Përgjithësisht ka qenë ditë e qetë. Ne kemi lëvizur në terren, nuk ka pasur probleme.
Ka qenë ditë e qetë votimesh dhe presim të ketë të dhëna më të mira, pasi tani pasdite ka pasur demokratë që i janë afruar qendrave të votimit. Nga të gjitha të dhënat që kemi, ka patur një fluks jo të vogël individësh që kanë votuar.
Kanë votuar individë me karta identiteti. Nuk është pranuar askush pa kartë. Ku ka ende persona jashtë qendrave të votimit, do të lejohen të votojnë,” është shprehur Gjana.
