Forcat e Armatosura të Mbretërisë së Bashkuar kanë riafirmuar mbështetjen e tyre për misionin paqeruajtës të NATO-s në Kosovë, KFOR, duke njoftuar se do ta vazhdojnë atë për të paktën edhe tri vitet e ardhshme. Mbretëria e Bashkuar ka qenë kontribuese kryesore në KFOR që nga 1999, kur trupat e NATO-s hynë në Kosovë për të sjellë paqe pas konflikteve të viteve ’90.
Qeveria britanike ka përmendur se angazhimi i saj përfshin një forcë rezervë prej qindra ushtarësh, të cilët janë të gatshëm të dislokohen shpejt në Kosovë për ta mbështetur misionin në rast nevoje. Dislokimi i fundit i rëndësishëm u krye në 2023, pas një sulmi të dhunshëm ndaj Policisë në veri të Kosovës.
Londra ka theksuar se mbështetja për KFOR-in do të zgjasë deri në dhjetor të vitit 2028 si pjesë e strategjisë “NATO në radhë të parë”, që është parashikuar në Rishikimin Strategjik të Mbrojtjes, dhe për të rritur sigurinë në Ballkanin Perëndimor. Njoftimi për këtë vazhdimësi mbështetjeje u bë para fillimit të samitit të Procesit të Berlinit në Londër.
Kryeministri britanik, Keir Starmer, ka deklaruar se përkushtimi i Mbretërisë së Bashkuar për paqe dhe stabilitet në Ballkanin Perëndimor është i palëkundur. Ai nënvizoi se zgjatja e mbështetjes për KFOR-in tregon rolin e Britanisë si aleat kryesor të NATO-s dhe si vend që promovon vlerat e stabilitetit dhe demokracisë. Ministri i Forcave të Armatosura, Alistair Carns, theksoi se trupat britanike kanë kryer qindra misione për të mbështetur KFOR-in dhe se ky angazhim do të kontribuojë në sigurinë e Kosovës dhe të Ballkanit Perëndimor.
KFOR-i vepron si reaguesi i tretë i sigurisë në Kosovë, pas Policisë së Kosovës dhe misionit EULEX për sundimin e ligjit. Misioni i NATO-s është përgjegjës edhe për sigurinë në kufirin mes Kosovës dhe Serbisë. Pas rritjes së tensioneve në veri të Kosovës, NATO-ja ka rritur praninë e saj në rajon, me mbi 4,600 paqeruajtës nga 33 vende aktualisht në KFOR.
