Të paktën 15 palestinezë, mes tyre 8 fëmijë dhe 2 gra, u vranë nga një sulm ajror izraelit në Deir al-Balah, Gaza qendrore, teksa po prisnin për të marrë ndihma ushqimore pranë një klinike shëndetësore. Spitali “Al-Aqsa Martyrs” konfirmoi viktimat, ndërsa pamjet nga vendi i ngjarjes treguan trupat e fëmijëve të shtrirë në dysheme dhe mjekët duke u përpjekur të shpëtonin të plagosurit.
Organizata humanitare “Project Hope”, që menaxhon klinikën, e cilësoi sulmin si një shkelje flagrante të ligjit ndërkombëtar. Ushtria izraelite tha se kishte goditur një “pjesëtar të Hamasit”, por shtoi se “po heton” dhe “shpreh keqardhje për çdo viktimë civile”.
Dëshmitarët tregojnë se pacientët prisnin trajtim për kequshqyerje, infeksione dhe probleme të tjera kur ndodhi shpërthimi. “Gjithçka u mbulua me gjak dhe ulërima”, tha një banor për AFP.
Një e afërme e viktimave tha për BBC se mbesa e saj shtatzënë dhe dy fëmijët e saj ndodheshin aty për të marrë suplemente ushqimore. “Po vdesim përpara syve të gjithë botës,” tha ajo.
Ndërkohë, sulme të tjera izraelite janë raportuar edhe në zonën bregdetare të al-Mawasit, ku u vranë të paktën 5 persona, përfshirë 3 fëmijë.
Bisedimet për një armëpushim mes Izraelit dhe Hamasit mbeten të bllokuara, ndërsa kriza humanitare në Gaza thellohet çdo ditë. Sipas të dhënave të autoriteteve lokale, mbi 57 mijë palestinezë janë vrarë që nga 7 tetori 2023.
