Në një iniciativë për mbështetje të grave që përballen me kancerin e gjirit, Aeroporti Ndërkombëtar i Tiranës (TIA) dhe Kastrati Group, në bashkëpunim me YWCA of Albania, organizuan një marshim simbolik nën moton “Unë jam e fortë!”. Ky aktivitet, që u zhvillua në ambientet e jashtme të aeroportit, sjellë së bashku gra dhe burra, pacientë dhe të mbijetuara, si dhe përfaqësues të institucioneve private e publike, për të ngritur ndërgjegjësimin mbi rëndësinë e kontrolleve të rregullta mjekësore.
Marshimi kulmoi me ceremoninë e ndarjes së çmimeve “Vullnetar i Fjongos Rozë”, e cila nderoi individë dhe institucione që kanë kontribuar në betejën ndaj kancerit të gjirit. Çmimet u dorëzuan nga figura të njohura të politikës, si nënkryetarja e Kuvendit, Klodiana Spahiu, e cila theksoi rëndësinë e solidaritetit shoqëror në këtë kauzë të rëndësishme.
Zëvendësministrja e Shëndetësisë, Eugena Tomini, po ashtu theksoi angazhimin e saj për të përmirësuar situatën për pacientët, duke e lidhur përvojën e saj si nënë me përgjegjësinë profesionale. Moderatorja e Top Channel, Julka Gramo, u çmua për vullnetarizmin e saj dhe njeri prej mesazheve të saj ishte se diagnostikimi i hershëm shpëton jetë.
Statistikat për vitin 2024 parashikojnë 805 raste të reja të kancerit të gjirit te gratë, ndaj rëndësia e diagnozave të hershme është theksuar nga anëtarja e bordit të TIA, Silva Uzuni. Ajo nënvizoi se 35% e punonjësve në aeroport janë gra, për të cilat është krijuar një politikë e mirëpërcaktuar për kontroll të shëndetit, duke përfshirë kontrollin e gjirit.
Uzuni përmendi gjithashtu se çdo tetor, grupi organizon fushata për informimin dhe mbështetje të mbi 1000 punonjëseve gra, duke theksuar se çdo jetë është e çmuar dhe çdo hap për të parandaluar mund të shpëtojë një jetë. Marshimi simbolizoi një mesazh të fortë solidariteti, shprese dhe kujdesi për shëndetin e grave dhe për t’u qëndruar të forta përballë sfidave.
