Do të mbahet sot në Gjykatën Kushtetuese seanca për shqyrtimin e kërkesës së grupit parlamentar të opozitës, për anulimin e marrëveshjes së nënshkruar mes kryeministrit shqiptar Edi Rama, dhe homologes së tij Georgia Meloni, për të sjellë ngritur në Shqipëri kampe për emigrantët. Seanca është kërkuar nga opozita që të mbahej me dyer të hapura, por një kërkesë e tilllë deri tani nuk është aprovuar nga Gjykata Kushtetuese.
Marrja në shqyrtim e kësaj padie nga ana e Gjykatës Kushtetuese, solli automatikisht shtyrjen e votimit të saj në Kuvend, që ishte parashikuar që të kalonte në fund të muajit Dhjetor.
30 deputetë të opozitës e konsiderojnë marrëveshjen mes dy vendeve si cënuese të Kushtetutës së Shqipërisë por dhe të ligjit ndërkombëtar. Që pas firmosjes së marrëveshjes në Romë nëntorin e vitit të shkuar, ekspertë vendas dhe të huaj u shprehën skeptikë për një marrëveshje e cila i jep të drejtën e plotë Italisë për menaxhimin e krizës së emigrantëve, duke shfrytëzuar një territor të huaj të një shteti fqinj si Shqipëria, që nuk është vend anëtar i Bashkimit Europian.
