Kryeministri Edi Rama ka përshëndetur arritjen e marrëveshjes së energjisë mes Kosovës dhe Serbisë. Në një shënim në rrjetet sociale, kreu i qeverisë e ka cilësuar marrëveshjen e arritur si rrugën e duhur, ndërsa të tjerat, shton ai, janë humbje kohe.
“Gjë shumë e mirë marrëveshja e firmosur mes Kosovës e Serbisë për energjinë në Veri. Kjo është rruga e duhur. Të tjerat janë humbje kohe duke rrejt veten!”, shkruan Rama.
Në Bruksel sot, në mes të palëve nga Kosova dhe Serbia, është arritur dakordësia mbi udhërrëfyesin për zbatimin e marrëveshjes për energjinë nga 2013.
Bashkimi Evropian ka thënë se me marrëveshjen e sotme, Elektrosever, një kompani me pronësi serbe e themeluar në Kosovë dhe sipas ligjit të Kosovës, do të fillojë furnizimin me energji elektrike për konsumatorët në katër komuna me shumicë serbe në veri.
