Kryeministri i Malit të Zi, Millojko Spajiç, njoftoi se vendi do të ashpërsojë regjimin e vizave për shtetasit rusë në përputhje me politikat e Bashkimit Evropian. Ai theksoi angazhimin e Malit të Zi për të ndjekur politikën e jashtme dhe të sigurisë së BE-së, duke përfshirë ndalimet ndaj Rusisë, vendosura pas fillimit të pushtimit të Ukrainës në vitin 2022.
Një nga arsyet për këtë vendim është vlerësimi i Komisionit Evropian, i cili ka kërkuar që Mali i Zi të harmonizojë politikën e tij të vizave për të avancuar në procesin e anëtarësimit në BE dhe për të fituar akses në fondet e Planit të Rritjes për Ballkanin Perëndimor. Aktualisht, mbi 21,100 shtetas rusë jetojnë në Mal të Zi, ku mund të qëndrojnë deri në 30 ditë pa vizë. Ka qenë praktikë që ata të dalin për një periudhë të shkurtër dhe të rikthehen për të vazhduar qëndrimin pa pasur nevojë për vizë, duke shmangur kështu kufizimet.
Megjithatë, Komisioni Evropian ka theksuar se Mali i Zi duhet të vendosë viza për nëntë vende, përfshirë Rusinë, për të respektuar kërkesat e BE-së. Së fundmi, vendi ka vendosur gjithashtu vizat për shtetasit turq. Harmonizimi i politikës së vizave është një nga kushtet kryesore për procesin e anëtarësimit në BE, dhe Komisioni e konsideron këtë çështje si urgjente.
Ndërsa autoritetet malazeze kanë argumentuar se ndjekja e politikave të vizave të BE-së mund të ndikojë negativisht në sektorin e turizmit, i cili kontribuon me 26% në Prodhimin e Brendshëm Bruto, Brukseli ka theksuar se interesat ekonomike nuk duhet të kenë përparësi ndaj rregullave dhe detyrimeve të BE-së. Qeveria e Malit të Zi ka dhe një afat për të përfunduar harmonizimin e plotë të regjimit të vizave me rregullat e BE-së deri në fund të vitit 2027. Synimi është që deri në vitin 2028, Mali i Zi të bëhet anëtare e BE-së.
