Tregu shqiptar i automjeteve po përjeton një ndryshim të dukshëm: makinat e prodhuara në Korenë e Jugut po fitojnë terren, duke rrëzuar nga froni dominimin tradicional të makinave “made in Germany”.
Vetëm gjatë tre muajve të parë të vitit 2025, sipas të dhënave zyrtare nga Drejtoria e Përgjithshme e Shërbimeve të Transportit Rrugor, në vend janë shtuar 20,371 mjete të reja të regjistruara, nga të cilat 82% janë autovetura, raporton skyweb.al.
Duke përllogaritur edhe automjetet e çregjistruara, rezulton se në rrugë gjatë janar-mars 2025 u futën edhe rreth 18 mijë automjete të tjera, një shifër që pasqyrohet qartë edhe në trafikun gjithnjë e më të dendur, veçanërisht në qytetet kryesore, duke nxjerrë në pah edhe mungesat serioze në infrastrukturë.
Sipas statistikave, 29% e mjeteve të importuara në janar-mars 2025 janë me origjinë koreane, një rritje e ndjeshme që lidhet ngushtë me çmimet më konkurruese që ofrojnë këto marka, krahasuar me automjetet gjermane apo italiane. Në kontrast, markat gjermane zënë vetëm 16.7% të totalit të importit, të ndjekura nga italianet me 15.3%, zviceranet me 8.1%, kinezet me 7% dhe amerikanet me 6.9%.
