Katër persona humbën jetën dhe më shumë se 11 të tjerë u plagosën kur një makinë, në arrati nga policia, përplasi me shpejtësi verandën e një lokali në Hillsborough. Shoferi, 22-vjeçari Silas Sampson, u arrestua në vendngjarje dhe përballet me katër akuza për vrasje me automjet, si dhe akuzat e tjera për lëndime të rënda trupore ose vdekje. Ai tani ndodhet në burgun e qarkut Hillsborough.
Sipas autoriteteve, njësi ajrore policore kishte vëzhguar makinën e Sampson teksa bënte gara në Hillsborough Avenue rreth orës 12:40 të mëngjesit. Kur oficerët tentuan ta ndalonin, ai shmangu kontaktin dhe vazhdoi drejt qendrës së qytetit me shpejtësi. Pamjet e publikuara tregojnë momentin dramatik kur Toyota humbet kontrollin dhe përplaset me një grup njerëzish që ishin në lokal.
Tre persona u shpallën të vdekur në vendngjarje, ndërsa viktima e katërt ndërron jetë më vonë në spital. Po ashtu, midis të plagosurve ka edhe individë në gjendje kritike. Viktimat ende nuk janë identifikuar publikisht pasi autoritetet presin të njoftojnë familjarët e tyre. Ngjarja ka tronditur komunitetin dhe ka hedhur dritë mbi rreziqet që sjellin ndjekjet policore dhe sjelljet e papërgjegjshme në rrugë.
