Presidenti francez Emmanuel Macron ka njoftuar se qeveria e tij do të përshpejtojë procedurat ligjore për të ndaluar përdorimin e rrjeteve sociale për fëmijët nën 15 vjeç, me qëllimin që kjo masë të hyjë në fuqi para vitit të ri shkollor në shtator. Ai shprehu shqetësimin se emocionet e të rinjve nuk duhet të manipulohet nga platformat digjitale, duke theksuar se edukimi i fëmijëve nuk është për shitje.
Përveç ndalimit të përdorimit të rrjeteve sociale, Macron shpalli se telefonat celularë do të ndalohen edhe në shkollat e mesme, duke e quajtur këtë një rregull të domosdoshëm për nxënësit, familjet dhe mësuesit. Kjo nismë vjen në kontekstin e një vale të vendeve perëndimore që po forcojnë ligjet për mbrojtjen e të miturve online, e ndjekur pas ligjit të Australisë që ndalon përdorimin e rrjeteve sociale për fëmijët nën 16 vjeç, dhe sinjaleve të ngjashme nga qeveria britanike.
Deputetja Laure Miller, që udhëheq nismën në Francë, e theksoi si problem kryesor mungesën e verifikimit të moshës në platformat sociale. Ajo theksoi se zbatimi i rreptë i Aktit Europian për Shërbimet Digjitale (DSA) do të detyrojë platformat të kërkojnë prova të vërteta të moshës së përdoruesve. Miller shpjegoi se pavarësisht se do të ketë mundësi për t’i anashkaluar rregullat, është e domosdoshme të krijohet një hap fillestar për mbrojtjen e të miturve.
Në Australi, pas miratimit të ligjit, më shumë se 4.7 milionë llogari të fëmijëve nën 16 vjeç janë mbyllur ose çaktivizuar. Kryeministri Anthony Albanese theksoi se ky vendim u mor si pasojë e presioneve nga prindërit dhe të rinjtë që kërkonin më shumë mbrojtje nga ndikimet negative të rrjeteve sociale. Kjo nismë tregoi një angazhim të dukshëm për mbrojtjen e fëmijëve në një kohë kur ekspozimi ndaj mediave sociale po rritet.
