Njeriu që vrau Pjerin Xhuvanin katër ditë përpara zgjedhjeve të 25 prillit të vitit të kaluar, Arbër Paplekaj ndodhet në gjyq. Dëshmia e tij, që u zbardh dy ditë më parë zuri hapësirë në të gjitha mediat.
Ai tregoi të gjithë ngjarjen, duke dhënë versionin e tij si arriti debati kulmin deri sa u shkrep arma drejt doktorit Pjerin Xhuvani. Mesazhi i tij për vrasjën e personit që vrau heshtën sallën e gjyqit.
“A më dhemb shpirti që kam vra babën e një vajze? Kam 3 djem. Tre djem dhe një vajzë. Çdo babë ka marrëdhënien e vet me vajzën. Por vajza jeme është e vetmja që mundet me më dhan mu urdhër, është e vetmja që më largon nga detyra, është e vetmja që mundet me më tregu se ça me ba, është e vetmja që zgjedh edhe teshat e mija.
A ndjej dhimbje në shpirt që i kam vra babën e një vajze? Po! Ka vetëm një person në Republikë të Shqipërisë dhe në këtë botë ndaj të cilit unë e mbaj krytin ulë, edhe është ajo vajzë. As edhe një person tjetër në kët botë.
Ajo vajzë ka të drejtë me fol ça të dojë, ajo vazjë ka të drejtë me keqkuptu, me keqinterpretu uljen e krytit tem. Kushdo tjetër që uljen e krytit tem e keqinterpreton, nuk i bën llogaritë mirë. Ajo vajzë është e vetmja në këtë botë që unë kam për t’nejt me krye ulë deri ditën që të vdes” deklaroi ai.
Pak kohë më parë në media doli momenti i vrasjes së Xhuvanit dhe në këtë moment reagoi në media për herë të parë vajza e doktorit. Vajza e Pjerin Xhuvanit kërkoi nëpërmjet avokates së saj, Rezarta Tahiraj, një hetim për publikimin e videove të vrasjes së të atit.
Avokatja u shpreh asokohe se vajza e viktimës, Evangjeli Xhuvani, i ka “kërkuar Prokurorisë pranë Gjykatës së Rrethit Gjyqësor Elbasan që të hetojë për të verifikuar se kush ka shkelur detyrimin e sekretit duke e bërë publike shpërndarjen e filmimeve ndërkohë që duhet të ishin përdorur vetëm në fushën gjyqësore”.
Po ashtu, kallëzimi i saj kishte qëllim të pengojë shpërndarjen e mëtejshme të këtyre filmimeve, pasi kjo situatë i “ka shtuar stres dhe dhimbje në konstatimin që babai i saj është vrarë pavarësisht pranisë të shumë policëve”.
