Lufta në Gaza bëhet edhe nëpërmjet urisë.
30 persona u vranë dhe 120 të tjerë u plagosën pranë një qendre shpërndarjeje të ndihmave humanitare në Rafah, në jug të Rripit të Gazës.
Burime lokale dhe humanitare, përfshirë Al Jazeera dhe Mbrojtjen Civile të Gazës, raportuan se të shtënat u qëlluan nga automjete të ushtrisë izraelite, ndërsa qindra civilë po shkonin drejt vendit për të marrë ndihma.
Incidenti ndodhi në zonën al-Maëasi, një zonë e përcaktuar nga Izraeli si “e sigurt” për civilët e evakuuar nga pjesë të tjera të Rripit jugor, i nformon “La Repubblica”.
Imazhet dhe rrëfimet e dëshmitarëve okularë të sulmit nuk janë ende të disponueshme, dhe ushtria izraelite (IDF) nuk ka lëshuar ndonjë deklaratë zyrtare.
Sipas Mbrojtjes Civile lokale, të shtënat u qëlluan nga automjete të blinduara të IDF-së drejt një turme civilësh që po i afroheshin një pike grumbullimi për ndihma ushqimore nga Fondacioni Humanitar i Gazës, pjesë e programit të ndihmës të koordinuar nga Shtetet e Bashkuara.
Zëdhënësi Mahmoud Basal e përshkroi atë si “një sulm të qëllimshëm kundër civilëve të paarmatosur”, duke nënvizuar rëndësinë e incidentit në një kontekst të shënuar tashmë nga javë të tëra armiqësie dhe krize humanitare.
“Vrasjet pasqyrojnë natyrën e këtyre zonave si kurthe masive vdekjeje, jo si pika ndihme humanitare. Ajo që po ndodh është një përdorim sistematik dhe keqdashës i ndihmës si instrument lufte, i përdorur për të shantazhuar civilët e uritur dhe për t’i grumbulluar ata me forcë në pikat e ekspozuara të vrasjes të drejtuara nga ushtria pushtuese, e financuar dhe e mbuluar politikisht nga administrata amerikane, e cila mban përgjegjësinë morale dhe ligjore për këto krime”, ishte reagimi i qeverisë së Gazës.
