Kryesocialisti Edi Rama po drejton sot një mbledhje të Grupit Parlamentar të Partisë Socialiste (PS), ku pritet të diskutohet kërkesa e SPAK për arrestimin e Belinda Ballukut. Mbledhja ka nisur në orën 11:00 në Pallatin e Brigadave.
Gjatë fjalës së tij, Rama kritikoi institucionet e drejtësisë, duke theksuar nevojën për të respektuar prezumimin e pafajësisë. Ai shprehu shqetësim për mënyrën si po hetohen punonjësit e administratës, duke sugjeruar se të dyshuarit po mbahen për orë të tëra në Prokurori dhe ushtrohet presion mbi ta për të pranuar faje që nuk i kanë.
Në vazhdim, Rama përmendi pezullimin e një ministri me vendim pa gjyq, duke e quajtur “ndërhyrje brutale” që nuk ka ndodhur asnjëherë në historinë e botës. Ai e kritikoi këtë veprim si të panevojshëm dhe të pajustifikueshëm, duke propozuar që në rastin më të rëndë, hetimet të kryhen në gjendje të lirë.
Kryeministri e quajti Shqipërinë në një “udhekruc” lidhur me integrimin në Bashkimin Europian, duke theksuar rreziqet që lidhen me humbjen e mundësive për të arritur qëllimin e anëtarësimit deri në vitin 2030. Ai shpreson që, pavarësisht sfidave, mazhoranca do të kalojë këtë test.
Rama përfundoi duke theksuar rëndësinë e qëllimeve të vendit për të ecur përpara në procesin e integrimit evropian, ndërsa përmendi se çdo hap i ri sjell sfida edhe më komplekse.
