Shqipëria vazhdon të përballet me përmbytje të konsiderueshme pas tre ditësh reshjesh të dendura shiu, sidomos në qarqet Shkodër, Lezhë, Durrës, Fier, Berat dhe Gjirokastër. Ministria e Mbrojtjes ka evidentuar se disa zona janë nën monitorim, ndërsa në Elbasan dhe veriun e vendit është shënuar reshje dëborës, duke krijuar vështirësi në qarkullim.
Në Vlorë, niveli i Vjosës ka kaluar mbi 8 metra, duke detyruar evakuimin e 13 familjeve pranë Urës së Mifolit dhe në Novoselë. Në Shkodër, fshati Obot ka dy metra ujë mbi rrugën kryesore dhe 15 banesa në Vaun e Dejës janë të rrethuara nga uji. Në Fushë-Arrëz, ka shkarje dherash duke shkaktuar dëmtime në infrastrukturë.
Lezhë është përballur me rreth 3000 ha tokë bujqësore nën ujë. Dy familje janë evakuuar dhe rreth 100 banesa po ndodhen nën ujë kryesisht në Dajç, Babullojë, Balldren dhe Shënkoll. Po ashtu, po punohet për të rivendosur argjinaturat në lumin Droje.
Në Durrës, një nga zonat më të prekura, forcat ndërhyjnë për të hequr ujin nga rreth 800 banesa. Rreth 250 persona janë strehuar në Shtëpinë e Pushimit të FA dhe 55 të tjerë në Kovalishencën e Ministrisë së Brendshme. Lumenjtë Erzen dhe Ishëm janë në kuota maksimale, duke bllokuar disa rrugë të qytetit.
Situata në Krujë është po ashtu problematike për shkak të çarjes së argjinaturës, me përmbytje në Dukagjin të Ri dhe Miliskë, ku 50 familje janë prekur. Në Shijak, 15 banesa janë nën ujë, sidomos në administratat Xhafzotaj, Maminas dhe Gjepalaj.
Gjirokastra ka hasur ne rrëshqitje dherash që kufizojnë qarkullimin në aksin Tepelenë-Gjirokastër, ndërsa niveli i lumit Vjosë është rritur në Memaliaj dhe Përmet. Korça po përjeton rrëshqitje dherash dhe bllokime rrugore, sidomos në Pogradec dhe Prrenjas.
Në Berat dhe Fier, janë prekur rreth 95 dhe 200 ha tokë bujqësore përkatësisht, ndërsa situata është më e qetë në qarqet e tjera të vendit.
