Sesioni i ri i Kuvendi ka nisur aty ku u mbyll i vjetri. Debat, akuza dhe bllokim të foltores. Pas himnit dhe fjalës së kryetares Lindita Nikolla, radhën për të folur e kishin kryetarët e grupeve sipas traditës parlamentare. Por deputeti demokrat Luçiano Boçi mori fjalën dhe akuzoi shumicën se bllokoi ngritjen e komisionit hetimor për udhëtimet e kryeministrit Edi Rama me charter.
Më pas drejt foltores u nis Sali Berisha me akuza për Edi Ramën. Ai tha se lekët që iu gjetën pastruesen Rozeta Dobi janë të qeveritarëve. Lindita Nikolla i preu fjalën, por deputetët Flamur Noka, Albana Vokshi dhe pjsa tjetër e grupit të tij u rebeluan duke bllokuar foltoren bashkë me ish-kryeministrin.
“Niko (i drejtohet Niko Peleshit) ka ardhur Rozeta ndonjëherë në shtëpinë tënde? Zonjë, po ty? Rri Ulsi (i drejtohet Ulsi Manjës), se këta të tutë, thonë edhe për ty që të ka hyrë në shtëpi. Ku është Ballukja. Unë kërkoj nga ju (Nikolla) që rregullat themelore të parlamentit të mos i shkelësh.
Absolutisht nuk do të merrem me ty. Je një zonjë ti, nuk më shkon mua të përdor këtë platformë. Por unë do ia kthej atij që të menaxhon ty. Ti bëj çtë duash, unë do të merrem me Edi Ramën. Tani i teket atij dhe thotë katër deputetë të përjashtohen nga grupi” tha ai. Duke parë situatën, Taulant Balla i kërkoi Lindita Nikollës të procedonte me shpjetësi dhe ta mbyllte seancën dhe kështu ndodhi.
