Liqeni i Kukësit, i rëndësishëm për prodhimin e energjisë në HEC-in e Fierzës, po përballet me një krizë të madhe mjedisore. Ndotja e pakontrolluar ka mbuluar sipërfaqen e tij, duke dëmtuar rëndë florën dhe faunën e tij, që njëherazi e bënë këtë liqen një ekosistem të pasur. Plastika dhe mbeturina të rrezikshme kanë mbytur ujërat, duke shndërruar një pasuri ujore në një tablo të hidhur.
Situata është përkeqësuar pas reshjeve të shumta, që kanë rritur ndjeshëm prurjet në lumenjtë që furnizojnë liqenin—Drini i Bardhë nga Kosova dhe Drini i Zi nga Maqedonia e Veriut. Tonelata mbeturinash tani lundrojnë mbi ujërat e liqenit, duke mbytur jetën brenda tij.
Ironikisht, një anije ekologjike moderne, e financuar nga qeveria gjermane me 180 mijë euro, ka mbetur e palëvizur në breg të liqenit që nga maji i vitit 2024. E parashikuar për të ndihmuar në pastrimin e liqenit, kjo anije sot është e mbuluar nga ndryshku dhe balta, duke përfaqësuar një relikte të harruar në vend që të shërbejë si mjet shpëtimi.
Kjo krizë nuk është vetëm një problem kapilar; ajo përbën një alarm të rëndësishëm për shëndetin, mjedisin dhe imazhin e qytetit. Përkundër kësaj situate alarmante, deri më tani nuk ka pasur reagime nga institucionet vendore. Liqeni po mbytet në mbeturina, ndërsa një zgjidhje efektive është braktisur vetëm pak metra larg tij.
Kjo situatë tregon një neglizhencë të thellë ndaj mjedisit dhe pasurive natyrore që gjithnjë e më shumë kërkojnë vëmendje dhe mbrojtje.
